Информатика жана эсептөө техникасы – бул маалыматты иштеп чыгуу, программалык камсыздоону түзүү, эсептөө тутумдарын долбоорлоо жана эксплуатациялоо менен байланышкан кенен тармак. Бул багыт теориялык жана практикалык аспектилерди камтып, информатиканын негиздеринен жана программалоодон баштап, эсептөө түзүлүштөрүнүн аппараттык ишке ашырылышына чейинки билимдердин кеңири спектрин өзүнө камтыйт.
Бул багыт боюнча бакалавр келечектеги кесиптик ишмердүүлүгү үчүн төмөнкү компетенцияларга ээ болот:
- Программалык камсыздоону (ПК) натыйжалуу иштеп чыгуу үчүн алгоритмдерди жана маалымат түзүмдөрүн изилдөө.
- Программалык камсыздоону иштеп чыгуу. Ар кандай максаттар үчүн ПК түзүү (тиркеме, веб-сайттарды, маалымат базаларын жана маалыматтарды иштеп чыгууну башкаруу тутумдарын иштеп чыгуу).
- Маалымат базалары менен иштөө принциптери, аларды долбоорлоо, оптималдаштыруу жана маалыматтардын коопсуздугун камсыздоо.
- Компьютердик тармактарды куруу, жөндөө жана тейлөө принциптерин изилдөө (тармактык протоколдор, тармактардын архитектурасы, тармактык коопсуздук).
- Компьютерлердин архитектурасын, эсептөө ресурстарын уюштурууну жана башкарууну изилдөө.
- Маалыматтык тутумдарды системдик талдоо жана долбоорлоо ыкмаларын жана технологияларын изилдөө.
- Жасалма интеллекттин заманбап технологияларын, машиналык үйрөтүүнү жана аларды тажрыйбада колдонууну изилдөө.
- Маалыматты коргоо жана киберчабуулдардын алдын алуу ыкмаларын изилдөө.
Бул тармактын адистери программалык камсыздоону иштеп чыгуу, системдик администраторлук, маалыматтарды талдоо, жасалма интеллект тармагындагы изилдөөлөр жана башка көптөгөн чөйрөлөрдө иштей алышат.
Эсептөө техникасынын каражаттарынын интенсивдүү өнүгүшү маалыматтык тутумдарды жана технологияларды адам ишмердүүлүгүнүн бардык чөйрөлөрүнө киргизүүгө шарт түздү. Заманбап маалыматтык-компьютердик технологиялар компаниялардын, банктардын, өкмөттүн жана калктын ортосундагы байланышты түз жолго коюп, ортомчулардын узун чынжырларын алып салат жана ар кандай бүтүмдөр менен операциялардын өткөрүлүшүн тездетет. IT (маалыматтык технологиялар) адиси кесиби адам ишмердүүлүгүнүн бардык чөйрөлөрүндө суроо-талапка ээ болуп, дүйнөдөгү эң мыкты кесиптердин катарына кирүүдө. Маалыматтык коомдун жаңы «санариптик экономикасы» бул чөйрөнүн адистерисиз өнүгө албайт.
Бул багыт боюнча бакалавр кесиптик ишмердүүлүктүн төмөнкү түрлөрүнө даярдалат:
- Долбоорлоо-конструктордук:
- Маалыматтык тутумдарды киргизүү чөйрөсүн системдик талдоо;
- Маалыматтык тутумду техникалык жана жумушчу долбоорлоо;
- Процесстерди жана тутумдарды моделдөө;
- Долбоордук документтердин бардык түрлөрүн иштеп чыгуу, макулдашуу жана чыгаруу.
- Базалык жана колдонмо-маалыматтык технологияларды долбоорлоо:
- Маалыматтык технологияларды ишке ашыруунун математикалык, алгоритмдик жана программалык каражаттарын иштеп чыгуу;
- Өндүрүштүк-технологиялык ишмердүүлүк:
- Маалыматтык коомдун экономикасынын шартында илим, техника, билим берүү, медицина, административдик башкаруу, юриспруденция, бизнес, ишкердик, коммерция, менеджмент, банк тутумдары, маалыматтык тутумдардын коопсуздугу, геомаалыматтык тутумдар, экология, тейлөө чөйрөсү, жалпыга маалымдоо тутумдары, дизайн, медиаиндустрия тармактарындагы, ошондой эле ар кандай профилдеги ишканалардагы жана ишмердүүлүктүн бардык түрлөрүндөгү кесиптик ишмердик объекттерин иштеп чыгуу технологияларын түзүү жана ишке киргизүү.
- Уюштуруу-башкаруу:
- Жумуш орундарын уюштуруу, аларды техникалык жактан жабдуу, компьютердик жабдууларды жайгаштыруу;
- Кирүү маалыматынын сапатын көзөмөлдөөнү уюштуруу.
- Монтаждоо-жөндөө:
- Маалыматтык тутумдарды сыноо иретинде эксплуатациялоого киргизүү үчүн программалык камсыздоону инсталляциялоо (орнотуу), каталарын оңдоо жана техникалык каражаттарды жөндөө;
- Даяр компоненттерден программалык тутумду чогултуу; маалыматтык тутумдарды өнөр жайлык эксплуатациялоого киргизүү үчүн программалык камсыздоону орнотуу, каталарын оңдоо жана техникалык каражаттарды жөндөө;
- Маалыматтык тутумдарды сыноодон өткөрүү жана эксплуатацияга тапшыруу;
- Маалыматтык тутумдарды жана алардын компоненттерин сыноодон өткөрүүгө жана сыноо иретинде эксплуатацияга тапшырууга катышуу.
- Сервистик-эксплуатациялык:
- Маалыматтык тутумдардын жана технологиялардын ишке жөндөмдүүлүгүн колдоо жана берилген функционалдык мүнөздөмөлөргө жана сапат критерийлерине ылайык коштоо;
- Маалыматтык тутумдардын жашоо циклин камсыздоо; маалыматтык тутумдардын жана технологиялардын маалыматтарынын коопсуздугун жана бүтүндүгүн камсыздоо.