18-ноябрда Кыргызстан Эл аралык университетинде “Баалоо системалары боюнча диалог” аймактык форумунун алкагында жаш адистер үчүн семинар өттү. БУУнун өнүктүрүү программасынын аймактык баалоо боюнча кеңешчиси Салтанат Расулова катышуучуларды БУУнун нормалары жана стандарттары, заманбап баалоо куралдары жана БУУ системасындагы жаш адистер үчүн карьералык мүмкүнчүлүктөр менен тааныштырды.
Форумдун ачылышында Кыргызстан Эл аралык университетинин ректору Елена Савченко куттуктоо сөзүн сүйлөдү. Ал баалоо системалары үчүн квалификациялуу кадрларды даярдоодо университеттердин ролунун өсүп жатканын баса белгиледи. Форумдун жүрүшүндө катышуучулар улуттук баалоо системаларын, жаштардын катышуусун, климаттын өзгөрүшүнө туруктуулук боюнча Туруктуу өнүктүрүү максаттарына (ТӨМ) жетүүдөгү баалоонун ролун жана баалоодо жасалма интеллектти жоопкерчиликтүү колдонууну кошо алганда, аймактык мыкты тажрыйбаларды талкуулашты.
Университеттердин ролуна арналган сессияда Жеңишкүл Молдокеева IUKтин баалоо жаатындагы билим берүү программаларын иштеп чыгуу жана эл аралык өнөктөштөр менен кызматташууну бекемдөө тажрыйбасын сунуштады.
Форум академиялык коомчулуктун, мамлекеттик органдардын жана эл аралык уюмдардын ортосундагы өз ара аракеттенүү үчүн маанилүү платформага айланды. Кыргызстан Эл аралык Университети Кыргыз Республикасынын Президентинин алдындагы Улуттук Стратегиялык Демилгелер Институту жана Улуттук Мониторинг жана Баалоо Тармагы менен биргеликте өнүктүрүү агенттери менен өнөктөштүктө биргелешип уюштуруучу катары иш алып барды.
